منحني الله نعمة أبنى ان يكون من ذوي الهمم..ولم أكن أتخيل في يوم ان ابحث عما يبحث عنه من هم في نفس حالته..من حقوق كفلها له الدستور والقانون..ليمنعها عنه المسئولون بحجة تقنين الاوضاع !!..
لدينا سيارة ولكن كبر الولد ويحتاج الي سيارة كبيرة فكرنا في حل ..وكانت الآراء هو شراء سيارة من سيارات ذوى الهمم..قدمنا الاوراق وتقارير وايام وشهور وورق رايح وورق جاي وتعقيدات لا اول لها من آخر..والناس تعبانة فوق تعب ذويها..وكله بحجة ضمان وصول الدعم لمستحقيه!..
ما علينا مشينا الطريق اللي كل خطوة فيه بتفكرك بتعب ابنك ومعاملات غير آدمية من البعض ..ووسط قرارات بعدم مواصلة التقديم..الا ان الداعمين للاسرة يحاولون إذابة تلك العقبات والسخافات بتقديم الدعم لنا..
اخيرا حصلنا علي جواب سيارة ..بس المفاجأة المضحكة جدا ان الامور متوقفة والجواب نبله ونشرب ميته!!..سألنا أيه الحكاية قالوا ظبطوا كتير واخدين عربيات وباعوها والدولة بتحاول تسيطر علي الامور عشان الدعم يوصل للمستحقين..
قولنا جميل جدا بارك الله جهودهم ..طيب يعني ممكن الازمة تاخد كام شهر..لكن الحقيقة انه حتي الان وبعد تقريبا مرور سنتين مفيش حاجة اتحلت ..والجواب قرب يخلص والمفروض نروح نعمل تاني كل الاجراءات ..
السيدة وزيرة التضامن ممكن حد ياخد الجواب ويجبلنا العربية اللي هي حق من حقوق الولد ..شكرا